2022/12/06

"Улаанбаатар 2023" Зүүн Азийн Залуучуудын наадмын элч төлөөлөгч сонгогдов

info@inder.mn
21 цаг 48 минутын өмнө

Зүүн Азийн залуучуудын наадам 2023 оны наймдугаар сард Улаанбаатар хотноо болно. Манай эх оронд анх удаа зохиогдох наадмын элч төлөөлөгчөөр волейболын олон улсын шүүгч Х.Номинзулыг томилсон гэж МҮОХ-оос мэдээллээ.

Х.Номинзул нь 2017-2018 онд Сөүлийн их сургуулийг спортын менежментийн магистраар дүүргэсэн бөгөөд 2021 оноос Швейцарын Лозанн хотноо Спортын шинжлэх ухаан, технологийн академид Спортын удирдлага, технологийн магистраар суралцаж байна.

Суралцах хугацаандаа Олон улсын сагсан бөмбөгийн холбооны World Tour, Дэлхийн хөнгөн атлетикийн холбооны Алмазан лигийн тэмцээнүүд, Дэлхийн допингийн эсрэг агентлагийн боловсролын хөтөлбөр, Volleyball World телевизийн шууд дамжуулалтын төсөл болон Сургуулиудын спорт холбооны Манлайлагч охид төсөл зэрэг олон арга хэмжээ, уралдаан тэмцээнд ажиллаж, туршлага хуримтлуулжээ.

Энэ үеэр Х.Номинзул “Наадмын элч төлөөлөгчөөр сонгогдоно гэдэг миний хувьд нэр төрийн хэрэг байлаа. Зүүн Азийн залуучуудын наадам бол Монголын спортын хөгжлийг хурдасгах маш том арга хэмжээ, хамгийн том мега төсөл. Энэхүү наадмын зохион байгуулалтын ажилд өөрийн бүх нөөц, бололцоог дайчлан зүтгэх болно” гэв.

Зүүн Азийн залуучуудын наадам 2023 оны наймдугаар сарын 16-23-ны өдрүүдэд болох ба есөн орны 1500 гаруй тамирчин спортын 12 төрөлд өрсөлдөх юм.


 Эх сурвалж: МҮОХ




Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна