Эрүүл мэндийн салбарынхан шинэ технологи, цахим шилжилтээ танилцуулав

Нийслэлийн Засаг Даргын Тамгын Газар, Нийслэлийн Эрүүл Мэндийн Газар хамтран “Ub healthe care week” үзэсгэлэнг 3 өдөр зохион байгууллаа.

  Тус үзэсгэлэн Нийгмийн эрүүл мэндийн тусламж, үйлчилгээнд салбар дундын болон аж ахуй нэгж, иргэдийн оролцооны шинэ хандлагыг бий болгох, эрүүл мэндийн байгууллагуудын цахим шилжилтийн үйл явцад дэвшил гаргах, тулгамдсан асуудлыг шийдвэрлэх зорилготой юм.

  Үзэсгэлэнд Нийслэлийн эрүүл мэндийн газрын харьяа эрүүл мэндийн байгууллагууд, Мэдээлэл технологийн компаниуд болон хувийн хэвшлийн байгууллагууд оролцож, эрүүл мэндийн салбарт нэвтрүүлсэн шинэ технологи, менежментийг танилцуулан туршлага солилцлоо.

  Нээлтийн арга хэмжээний үеэр Эрүүл мэндийн яамны Төрийн нарийн бичгийн дарга Ц.Эрдэмбилэг “Эрүүл мэндийн салбарт бодлогоор хэрэгжүүлж буй олон шинэчлэлийн ажлыг өнөөдрийн үзэсгэлэнд танилцуулж байна. Эрүүл мэндийн салбар гүйцэтгэлийн санхүүжилтийн тогтолцоонд шилжсэнээр эмнэлгүүд ард иргэдэд тусламж, үйлчилгээг чанартай, хүртээмжтэй хүргэвэл санхүүжилт их авдаг болсон. Ингэснээр эрүүл мэндийн байгууллагууд бие даан хөгжих, техник технологио шинэчлэх, эмч, мэргэжилтнүүдийн цалин урамшууллыг нэмэгдүүлэх, нийгмийн асуудлыг шийдвэрлэх гэх мэт маш олон эерэг үр дүн гарч байна. Өнгөрсөн хугацаанд эрүүл мэндийн байгууллагууд 259 ажилчинд байрны урьдчилгаа болох 20-30 сая төгрөгийн буцалтгүй тусламжийг олгон эмч, мэргэжилтнүүд байрандаа эхнээсээ орсон бол эмнэлгүүд эмч, ажилчдынхаа цалинг 10-50 хүртэлх хувиар нэмэгдүүлсэн байна. Бид эрүүл мэндийн салбарыг зөвхөн эмнэлгийн тусламж, үйлчилгээ үзүүлдэг гэж л ойлгож, эмнэлгийг шүтэх тогтолцоотой байсан бол одоо цаг үе өөрчлөгдөж, өвчин тусахаас нь өмнө урьдчилан сэргийлэх эрт илрүүлэх тал дээр анхаарал хандуулж ажиллаж байна. ” гэж энэ үеэр онцоллоо.

Үзэсгэлэнгийн өдрүүдэд “Эрүүл мэндийн удирдлага, эдийн засаг”, “Улаанбаатар хотын хүн амд үзүүлж буй эрүүл мэндийн тусламж үйлчилгээ” сэдэвт эрдэм шинжилгээ, онол практикийн бага хурал болж, 20 орчим илтгэл хэлэлцүүлжээ.