Иргэд цаг тутамд цахим залилангийн хохирогч болж байна

"Манай улсад үйлдэгдэж байгаа Залилах 4 гэмт хэрэг тутмын 3 нь цахимаар үйлдэгдэж байна. Цагт нэг хүн цахим залилангийн хохирогч болж байгаа тул бусдад дансаа ашиглуулахгүй байх, хувийн мэдээллээ нууцлах хэрэгтэй"-г Эрүүгийн цагдаагийн албанаас анхаарууллаа. 

Сүүлийн үед фэйсбүүк хаяг, цахим шуудан, интернэт банк руу хууль бусаар нэвтэрч, мөнгө шилжүүлэн авах, залилах гэмт хэргийн шинжтэй үйл ажиллагаа идэвхжиж байгаа аж. Тиймээс иргэд цахим орчинд аливаа вэб холбоос руу орохгүй байх, найз нөхдөөс ирүүлсэн мөнгө зээлэх хүсэлтийг нягталж байх, хэрэв гар утсанд код бүхий мессеж ирж, түүнийг хэн нэгэн этгээд авахаар холбогдож байвал дамжуулж өгөхгүй байх шаардлагатай.

 Мөн энэ төрлийн гэмт хэрэг үйлдэгч этгээд нь бусад этгээдэд хувь өгөх хэлбэрээр хууль бус үйл ажиллагаандаа татан оролцуулдаг тул хүүхэд, залуучууд та бүхэн хэн нэгний санал болгосноор банкны дансаа ашиглуулах, бэлэн мөнгө болгон гаргаж өгөх зэрэг үйлдэлд анхаарал сэрэмжтэй хандах хэрэгтэй. 

Хэрэв бусдын фэйсбүүк хаяг, цахим шуудан болон интернэт банк руу хууль бусаар нэвтэрсэн, энэ үйл ажиллагаанд оролцсон тохиолдолд 5 хүртэл жилийн хугацаагаар хорих ял шийтгүүлэх хуулийн заалттай аж.