Сингапур улсын хот дахин төлөвлөлтийн туршлагыг нэвтрүүлнэ

Улсын Их Хурлын гишүүн Г.Лувсанжамцаар ахлуулсан ажлын хэсэг Бүгд Найрамдах Сингапур Улсад ажиллаж байна.

 Сингапур Улсын “Township” төлөвлөлт, түүний дотор “community based” концепц, мөн дагуул хотыг хөгжүүлсэн туршлагууд нь хөгжиж буй орнуудын анхаарлыг татдаг.

 Тус улсад ажиллаж байгаа УИХ-ын зарим гишүүд, Хот байгуулалт, барилга, орон сууцжуулалтын яамны удирдлага, хот төлөвлөгчид эдгээр туршлагатай танилцаж, тодорхой яриа хэлцлүүдийг хийж байна.

 Өнөөдөр (2024 оны Арван хоёрдугаар сар сарын 3) Сингапурын хамтын ажиллагааны байгууллагын тэргүүн Конг Ви Мунтэй уулзлаа.

 Энэ үеэр, Township төлөвлөлтийг монголд нутагшуулах чиглэлээр хамтран ажиллахаар ярилцав. Мөн гэр хорооллын дахин төлөвлөлтийн хүрээнд Сингапур Улсын зөвлөх үйлчилгээний төсөл хэрэгжүүлэх, ногоон болон эрчим хүчний хэмнэлттэй барилгын менежмент, стандарт, технологи, шийдэл нэвтрүүлэх, хот байгуулалт, барилгын салбарт хүлэмжийн хийн ялгарлыг бууруулах, Үндэсний орон сууцны корпорацийг байгуулахад эрх зүйн орчныг шинэчлэхэд Сингапурын туршлагаас суралцах, хамтарч ажиллахаар боллоо.

 Монгол Улс, Бүгд Найрамдах Сингапур Улс хоорондын дипломат харилцаа тогтоосны 54 жилийн ой энэ жил тохиож байгаа юм. Өнгөрсөн хугацаанд манай хоёр орон эдийн засаг, агаарын харилцаа зэрэг салбарт хэлэлцээр байгуулж хамтын ажиллагааг үр дүнтэй хэрэгжүүлсээр ирсэн. Цаашид хоёр орны хот байгуулалт, барилга, орон сууцжуулалтын чиглэлээр хамтын ажиллагаандаа ахиц гаргахын төлөө идэвх чармайлттай, үр дүнтэй хамтран ажиллахаа талууд илэрхийллээ.

 Энэ уулзалтын үеэр Монгол Улсын Хот байгуулалт, барилга, орон сууцжуулалтын яам болон Сингапурын Хамтын ажиллагааны байгууллага хооронд хамтын ажиллагааны санамж бичигт Хот байгуулалт, барилга, орон сууцжуулалтын Төрийн нарийн бичгийн даргын үүргийг түр орлон гүйцэтгэгч С.Төмөрхүү, Сингапурын Хамтын ажиллагааны байгууллагын тэргүүн Конг Ви Мун нар гарын үсэг зурлаа гэж Хот байгуулалт, барилга, орон сууцжуулалтын яамнаас мэдээллээ.