Б.Халиун чөлөөт бөхийн U20 дэлхийн аваргаас МӨНГӨН медаль авлаа

#Чөлөөтбөх U20 дэлхийн аварга шалгаруулах тэмцээнээс Бямбасүрэнгийн Халиун Япон, Азербайжан, Канадын бөхийг ялж мөнгөн медаль хүртлээ.

Чөлөөт бөхийн U20 насны ангиллын дэлхийн аварга шалгаруулах тэмцээн Испанийн Понтеведра хотод үргэлжилж байна.

Тэмцээнд Монголын шигшээ багийн 11 тамирчин оролцож байгаагаа өчигдөр эмэгтэй -55 кг жинд Бямбасүрэнгийн Халиун мөнгөн медаль хүртлээ.

Шигшээ 16-д Канадын тамирчныг 11-0, шөвгийн наймд Азербайжаны бөхийг 6-2, хагас шигшээд Япон бөхийг идэвхээр ялсан тэрээр финалд АНУ-ын бөхөд 4-0 харьцаагаар ялагдсан юм.

Мөн

• эмэгтэй -76 кг жинд Таравын Түвшинжаргал барилдсан бөгөөд хүрэл медалийн төлөө Туркийн бөхөд 8-2 харьцаагаар ялагдаж 5-р байр эзлэв.
• эмэгтэй -72 кг жинд барилдсан Отгонбатын Цэлмүүн шигшээ 16-д Энэтхэгийн бөхөд ялагдан тэмцээнээ дуусгасан
• эмэгтэй -65 кг жинд Эрдэнэ-Очирын Одгэрэл дагах барилдаан хийнэ. Түүнийг шөвгийн наймд ялсан Японы тамирчин финалд шалгарсан юм.
• эмэгтэй -62 кг жинд Бямбасүрэнгийн Хулан Италийн бөхөд ялагдаж тэмцээнээ дуусгасан.
• эмэгтэй -57 кг жинд Мягмарсүрэнгийн Номин-Эрдэнэ дагах барилдаан хийнэ. Түүнийг шөвгийн наймд ялсан Мексикийн бөх финалд шалгарсан

Өнөөдөр эрэгтэй чөлөөт бөхийн барилдаанууд эхлэх ба Монголын шигшээ багаас -70 кг жинд Алтангэрэлийн Анх-Эрдэнэ, -74 кг жинд Мөнхбатын Тулуй, -86 кг жинд Наадамбатын Батбилгүүн, -92 кг жинд Дэмбэрэлийн Дэлгэрдалай, -125 кг жинд Батбаярын Намбардагва нар хүч үзнэ.