Өмнөговь аймаг мал аж ахуйн салбарын өвөлжилт, хаваржилтын бэлтгэлийг 88.3 хувь хангаад байна

ОБЕГ-ын дарга, хошууч генерал Г.Ариунбуян тэргүүтэй ажлын хэсэг Өмнөговь аймагт ажиллаж байна.

Энэ хүрээнд тус аймгийн Онцгой комиссын ээлжит хуралдаанд оролцож, холбогдох үүрэг чиглэлийг өглөө.

Тэрбээр "Аймгийн хэмжээнд 2021-2024 онд 719 удаагийн гамшиг, аюулт үзэгдэл, осол тохиолдсон нь Өмнөд бүсийн хэмжээнд тохиолдсон гамшиг, ослын 22.5 хувийг эзэлж байна. Алба хаагчид дээрх хугацаанд 459 эрдэнэт хүний амь нас, төр хувийн хэвшлийн 31.2 тэрбум төгрөгийн өмч хөрөнгийг авран хамгаалжээ. Аюулт үзэгдэл, ослын дүн мэдээнээс харахад гал түймэр хамгийн олон буюу 428 удаагийн тохиолдол бүртгэгдсэн байна. Энэ нь нийт тохиолдлын 59.0 хувийг, зам тээврийн осол, цас, шавар, ус элсэнд суусан, төөрсөн сураггүй болсон зэрэг хүний үйл ажиллагаатай холбоотой осол 169 удаа буюу 23.0 хувийг эзэлж байна. Өөрөөр хэлбэл нийт тохиолдлын 82.0 хувь нь хүний санамсар, болгоомжгүй үйлдэлтэй холбоотой байна. Энэ нь цаашид хүний санамсар болгоомжгүй үйлдлээс гардаг аюул, ослын эрсдэлийг бууруулах, иргэд, олон нийтийн хандлага, хариуцлагыг нэмэгдүүлэх шаардлагатай байгааг харуулж байна" хэмээн онцолсон юм.

Өмнөговь аймгийн хэмжээнд 1,9 сая толгой мал өвөлжиж байгаагаас 59.0 мян толгой мал отроор өвөлжиж, хаваржиж байна. Нийт малчин өрхийн 4,2 хувь нь отроор өвөлжиж байна. Түүнчлэн малчин өрхийн хувийн бэлтгэл 90,2 хувь, мал аж ахуйн салбарын 2024-2025 оны өвөлжилт, хаваржилтын бэлтгэлийг 88.3 хувь ханган ажиллаж байгаа талаар аймгийн Онцгой комиссоос танилцууллаа.

Хошууч генерал Г.Ариунбуян мөн "Өмнөговь аймгийн нутаг дэвсгэрийн хувьд зудын гамшигт өртөх байдал 16 баг Дунд, 29 баг Их, 14 баг Маш их түвшинд байгаа бол ганд өртөх байдал маш их түвшинд 5 баг, их түвшинд 47 баг хамаарч байна. Эрсдэлийн үнэлгээгээр өртөх байдал маш их, их гэж үнэлэгдсэн аюулт үзэгдлийн төрлөөр цаашид эрсдэлийг бууруулах, урьдчилан сэргийлэх арга хэмжээг тогтмол авч хэрэгжүүлэх шаардлагатай" хэмээн онцоллоо гэж ОБЕГ-аас мэдээллээ.