Ц.Нямдорж: 60 тэрбумын билэг тэмдэг нь М.Энхболд та өөрөө

Олон жил намдаа зүтгэлээ. Одоо бидэнд 60 тэрбумын асуудал байна. Ц.Сандуй, А.Ганбаатар хоёр Энхболдод схемээ танилцуулж, М.Энхболд асууж тодруулсан нь үнэн. 2016 онд Ч.Сайханбилэг алдаа гаргаагүй бол бид хэцүү байдалд байсан. Харин үүний дараа Ерөнхийлөгчийн сонгуулиар М.Энхболд ард түмнээс санал авч чадаагүй шалтгааны нэг нь цагаан сарын золголт, нөгөө нь 60 тэрбумын асуудал.

Тэр үед л ёс зүйгээ дагаад явцгаа гэж би хэлж байсан. Ер нь Ерөнхийлөгчийн сонгуулийн дараа байтугай 2020 оны сонгуулиар ч 60 тэрбумын асуудал намжихгүй байх. 60 тэрбумын билэг тэмдэг нь М.Энхболд та өөрөө. 65 гишүүний 40 хувь нь саналаа нэгтгээд байхад та юу бодож байна вэ? ЖДҮ-ийн эсрэг тэмцэнэ гээд байх юм. Гэтэл таны удирдаж байгаа УИХ-д олон гишүүд тэр зээлийг авчихсан байна. Жишээлбэл би өмнө нь 36/36-ийн хурал даргалж байхад над руу дайрч байсан учир парламентын нэр хүндийг бодоод өөрөө М.Энхболдтой уулзаад албаа өгч байсан.

Их хуралтайгаа тэмцдэг УИХ-ын дарга гэж байж болох уу? Манай намын хотын гэх фракцид Ц.Элбэгдоржийн толгойлдог АН-ын Үндэсний дэвшлийн нам гэх цөөн тооны асар их мөнгөтэй бүлэглэл М.Энхболдтой нэгдэж Эрдэнэтийн 49 хувийг авсан. Гэтэл хууль хяналтын байгууллага шалгахгүй байгаа. Харин хэлсэн хүнийг нь шалгана гэдэг. Энэ ажлаа Б.Хурцаар дамжуулж хийсэн юм. Эрдэнэтийн 49 хувь болон С.Зоригийн агсны аллагын хэргээр над дээр хэрэг нээхэд би дуугүй байсан.

Сая Л.Оюун-Эрдэнэ гишүүн дээр яг ижил зохион байгуулалттайгаар хэргүүд нээж эхэллээ. Т.Бадамжунай С.Эрдэнэ Ц.Элбэгдорж гэдэг мөрийтэй тоглоом тоглодог бүлэглэл ХХБ-р дамжуулж Хөтөл, Эрдэнэт, Дарханы төмөрлөг, өнгөт металийн гээд асар их мөнгөний луйвраа хийсэн байдаг. Улаанбаатар банк бол М.Энхболдын банк. Ц.Дашдоржийн эхнэр ажиллуулж байгаад сахал Д.Эрдэнэбилэгт очсон. Х.Баттулга Ерөнхийлөгч болоогүй байхад, Ц.Элбэгдоржийг Ерөнхийлөгч байхад би М.Энхболдтой өрөөнд нь орж уулзаад анхааруулж байхад ч тоогоогүй.

Таван сая доллар бол энэ мөрийтэй тоглоомын бүлэглэлд мөнгө биш зүгээр л закуск. Н.Багабандийг байхад “Эх орон” бүлэглэл гэж байгуулсан, М.Энхсайхан, Д.Эрдэнэбэт нар дараа нь “Энержи ресурс” гэж байгуулсан. Н.Энхбаяр байхдаа бас бүлэглэл байгуулахад би эсэргүүцэн Цэцийн дүгнэлт гаргуулж байсан. “60 тэрбум” гэсэн толгойтой Т.Бадамжунай, М.Энхболд, Ц.Элбэгдорж нарын бүлэглэл тав, арван жилийн мөчлөгөөр явагддаг. М.Энхболд 2016 онд намын дарга байхдаа Ж.Эрдэнэбатыг Ерөнхий сайд болгон 10 жилийн ноёрхолоо тогтоохыг санаархсан.

Ах дүүгийн холбоотой гэх Ж.Эрдэнэбат тухайн үед Ерөнхий сайд болох ямар ч гавъяагүй хүн байсан. Монголын улс төр Б.Наранхүү шиг болсон. Морины уяан дээр нь эд нар бүгд л байж байдаг. Намын дарга асан Н.Энхбар ноёрхож байхдаа хамаг юмыг нь цөлмөөд алга болоход бид М.Энхболдыг харин зүтгүүлсэн, дэмжсэн, явуулсан. Одоо харин яах гэж байна вэ та? Надад бол бүлэглэл байхгүй бүх цаг үед МОНГОЛ АРДЫН НАМ л гэж байгаа.