Гелэн вокны хордлого: Хүүхдийг хэрхэн хамгаалах вэ

Сүүлийн үед гелэн вок буюу угаалгын капсулан шингэнийг ахуйн хэрэглээнд өргөнөөр ашиглаж байна.

АНУ-д хийгдсэн судалгаагаар 2012-2014 онд 18 ба түүнээс доош насны хүүхдүүдийн дунд гелэн вокны хордлогын 9814 тохиолдол бүртгэгдсэн байна.

Үүний ихэнх хувийг 0-5 насны хүүхдүүд эзэлж байгаа бөгөөд нийт тохиолдлын 12.5 хувь нь эмнэлэгт хэвтэж эмчлүүлсэн байна.

Нунтаг воктой харьцуулбал гелэн вокны хордлогод өртсөн хүмүүс эмнэлэгт хэвтэн эмчлүүлэх магадлал 4 дахин их байна.

Өөр нэгэн судалгаагаар хүүхдүүдийн ихэнх хувь (60 хувь) нь гелэн вокыг зориулалтын савнаас нь гаргаж ил тавьсан үед эсвэл савнаас нь авч хордлогод өртдөг байна.

Учир нь өнгө үзэмж сайтай, жижигхэн хэлбэртэй, гоё үнэртэй тул хүүхдүүдэд сонирхолтой санагдаж хордлогод өртөх эрсдэлийг бий болгодог.

Хордлогын үед илрэх шинж тэмдгүүд:

Аманд хийх, залгих замаар болон нүд, арьс, салстаар дамжин хордлогод өртдөг.  Хордлогын шинж тэмдгийг анхааралтай ажиглаж, доорх шинж тэмдгүүд илэрвэл яаралтай эмнэлэгт хандах хэрэгтэй.

Залгисан үед:

• Амьсгал давчдах, амьсгал авахад хүндрэл үүсэх
• Ханиалгах
•  Цээжээр хүчтэй өвдөх
• Бие сульдах, нойрмоглох
• Бөөлжих
• Ам хуурайших

Нүдэнд хүрсэн үед

• Нүдний салст үрэвсэх (улайх, загатнах)
• Нүдний хүчтэй өвдөх, цочрох, загатнах
• Нулимс цийлэгнэх

Арьсанд хүрсэн үед

• Загатнах
• Арьс хуурайшиж, улайж тууралт гарах
• Арьс түлэгдэх (зөвхөн удаан хугацаагаар арьсанд хүргэсэн тохиолдолд)

Иймд дараах зөвлөмжийг мөрдөж, хүүхдийн аюулгүй байдлыг хангаж, гелэн вокны хордлогоос сэргийлээрэй!

• Бага насны хүүхдийг хараа хяналтгүй орхихгүй байх
• Гелэн вокыг хүүхдийн гар хүрэх боломжгүй, харагдахгүй газар (түгжигддэг шүүгээ, өндөр тавиур) хадгалах
• Зориулалтын саванд нь байлгаж, ашиглахгүй үед савыг сайтар таглах
• Хэрэглээд дууссан хоосон савыг бусад зүйл хадгалахад ашиглахгүй байх
• Хэрэв хэн нэгэн санамсаргүйгээр гелэн вок залгисан бол нэн даруй эмнэлэгт хандана уу.

Эх сурвалж: НЭМҮТ